KALIBO, Aklan—Una eon sa establi nga kundisyon ro sangka eaeaki matapos imaw nga gilitan it sambilog pang eaeaki samtang nagasugae sa sangka lamay pasado alas- 11:00 it gabi-i it Miyerkules sa Barangay Tambak, New Washington.
Nakilaea ro biktima nga si Rolando Talabucon Jr., 37 anyos ag residente it nasambit nga lugar.
Suno kay P/Capt. Jerly Lapasaran, OIC chief of police it New Washington Municipal Police Station nga natabu ro insidente samtang nagasugae ro biktima.
Gulpi eamang nga nagpaeapit ro suspek nga si Alfred Rasgo, 40 anyos it nasambit man nga lugar sa likod ni Talabucon ag owa it anuman nga rason hay nagbo-oe raya it kutsilyo ag ginilitan ro anang tuo nga leog.
Insigidang nagpaeagiw ro suspek kun sa siin sa andang baeay eon raya naaresto it mga rumespondeng kapulisan sa ginpatigayon nga follow up operation it mga awtoridad.
Sa pag-aresto it mga pulis, nabawi kana ro gingamit nga kutsilyo.
Insigida man nga gindaea sa Aklan provincial hospital ro biktima nga nagapamayad eon makaron.
Nagapadayun pa suno kay P/Capt. Lapasaran ro imbestigasyon kon ano ro pinaka-ugat it nasambit nga insidente.
Ginapahaum eon man sigon ro mga nagakaigo nga dokumento para sa pagpasaka it kaso sa suspek nga makaron hay nakakulong sa detention facility it New Washington Municipal Police Station.
