KALIBO, Aklan — Patay eon kat masapwan ro sangka eaeaki nga naghana nga magtabok sa suba maskin nga gina-alegar nga naagahan raya sa inuman bandang alas-11:40 Martes it agahon sa Sitio Maeobong, Brgy. Lalab, Batan.
Suno sa report, insigidang gin-umpisahan ro rescue operation it MDRRMO-Batan para kay Jovily Aguel Jr., 29, sangka tagabantay it fishpond ukon katangkehan ag residente it Sitio Himbis sa nasambit nga barangay matapos nga makita nga nagakaway-kaway raya it anang alima nga nagapangayo it tabang matapos nga mag-ubog sa suba ag owa eon nakabutwa.
Bandang alas-9:00 it Martes it agahon hay nagdesisyon sigon raya nga mag-uli halin sa haeos paka-aga nga pakikipag-inuman kaibahan ro anang mga barkada.
Nagapadayun pa ro imbestigasyon it pulisya sa insidente.
