KALIBO, Aklan—Blangko ro tiya ag nagtindog nga nanay-nanayan it 47-anyos nga matandang binata kon ano ro posibleng mabug-at nga rason kon ham-an raya nga nagpakamatay pinaagi sa pagbigti sa sueod it anang baeay sa Brgy. Briones, Kalibo.
Suno kay Norie Concepcion, residente it nasambit nga lugar ag tiya it biktimang si Alyen Fernandez nga posibleng na-stress ro anang gumankon bangud sa kalisod nga anang nabatyagan makaron tuga it mga gastos kara sa pagka-ospital it anang unga nga nagabatyag it sakit nga kidney.
Ginpahayag dugang nga ko nagtaliwan nga adlaw hay nakabantay pa raya sa anang igkampod sa ospital ag matsa ginpang-euyahan sigon raya it eawas sa nakita nga kahimtangan it mga pasyante idtu.
Base sa report, bandang alas-6:00 it agahon kat masapwan it anang tiyo nga owa eon it kabuhi ro biktima nga nakabigti gamit ro sangka cable wire nga ginhigot sa baeayan nga butong.
Insigida nanda nga ginpahisayod ro insidente sa mga otoridad ag sa pag-usisa man it Scene Of the Crime Operatives (SOCO) hay owa it ibang external injuries nga nakita sa eawas it biktima.
May nakita man nga daywang suicide note sa kilid it biktima nga nagahambae may nakatago raya nga kwarta sa boesa it anang bag nga ginatantiya nga 48,000 pesos ag ro mga kataga nga “palangga ta kamo, indi eon ako kinyo magpakalisod”.
Emosyunal pa nga ginsaysay it anang tiya nga mga daywang dag-on pa eamang ro pang-edaron it biktima hay sanda eon ro nag-alaga kara matapos nga parehong namatay ro anang ama ag ina kat matumbahan it puno it boli ro andang baeay ag imaw eamang ro naka-eowas.
Gindugang pa kara nga mag-eowas nga mabuligon hay mabuot raya nga klase it tawo, kun sa siin, ro pagpamueangan eamang ro anang ginakalibangan.
Nasayuran nga hin-aga nga adlaw it Biyernes hay ro anang ika-48 anyos nga kaadlawan.
Sa makaron hay sa pagdumaea it sangka funeral homes ro bangkay it biktima.
Gina-imbestigahan man it mga otoridad ro motibo it biktima sa anang pagpakamatay.
