KALIBO, Aklan — Naka-hospital arrest makaron ro sangka 26-anyos nga eaeaki matapos maghana nga magpakamatay kat makonsensiya sa pagpanghimueos sa 16-anyos nga gumankon sa Libacao, Aklan.
Nakataeanang pasakaan it kasong rape in relation to Republic Act 7610 ro suspek nga si Jay-R Ruiz alyas “Bimboy”, sangka mangunguma, owa it asawa ag residente it nasambit nga lugar.
Sa imbestigasyon it pulisya, gin-abangan it suspek ro Grade 10 student nga si alyas “Joy” samtang nga nagapa-agto sa eskwelahan bandang alas-7:00 it agahon ag ginhimuslan sa kilid it tupas.
Gintutukan sigon it tiyo it daeang espading ro dalagita rason nga nahimo ro maeain nga plano.
Suno pa sa pulisya, matapos ro insidente hay naghana nga magpakamatay ro suspek pinaagi sa pagbigti sa puno it indian mango, apang naputoe ro sanga nga ginhigtan rason nga nag-inom eon lang imaw it hilo ag naglaslas it pulso.
Insigida raya nga gindaea it mga umarestong tanod sa Aklan Provincial Hospital matapos maabutan nga maeuya eon.
Sa pihak nga parte, sa interview it Bombo Radyo, ginpamalibaran it suspek nga ha-rape nana ro anang gumankon.
Apang, haum sigon imaw nga atubangon ro anuman nga kaso nga igapasaka kontra kana.
Samtang sa resulta it ginpatigayon nga medico legal examination, positibo nga nahimuslan ro biktima.
