Sangka eaeaki nga nagamaneho sa sangka highway sa Oregon, U.S.A ro nagpanupod it linibong $100 bills sa mga kasunod nana nga motorista!
Suno sa report it state police, nakit-an nga nagamaneho sa Interstate 5 sa Eugene, Oregon ro 38-anyos nga si Colin Davis McCarthy nga nagsabwag it bundle it $100 bills halin sa bintana it anang saeakyan.
Bangud kara, nagpundo ro mga saeakyan sa anang likod para boe-on ro mga nag-eueupad nga kwarta.
Bangud sa traffic nga gintuga ni McCarthy, ginsundan imaw it mga state troopers.
Kat maabutan nanda raya, ginpangutana kon ham-an nga gin obra nana raya.
Ginhambae kara nga gusto eang nana nga magtau it blessing sa ibang tawo.
May plano pa kunta nga magpauean it uman it kwarta si McCarthy apang ginhinyu imaw it mga pulis nga punduhon eon bangud nga magatuga raya it aksidente sa highway.
Suno kay McCarthy, nagabalor it $200,000 dollars ro kwartang anang ginpanupod sa highway.
Nabo-oe nana ro kwarta halin sa savings account it anang pamilya.
Indi makapati ro pamilya ni McCarthy sa anang ginhimo ag nagpanawagan sanda sa mga nakapueot it kwarta nga ibalik raya kanda bangud nga naubos ro sueod it andang bank account.
Indi mabuligan it mga kapulisan ro pamilya bangud nga joint family account ro ginboe-an ni McCarthy it kwarta.
Sa makaron, ginapag-isipan pa it kapulisan kun pagapasakaan si McCarthy it kasong disorderly conduct bangud sa gin obra nana nga traffic sa highway.
