Kalibo Aklan ———–Nagdangop sa Bombo Radyo ro sangka eaeaki matapos nga gina-alegar nga indi i-release ro anang naka-impound nga motorsiklo hasta nga indi pagbayluhan ro anang tambutso.
Suno kay Rey Bautista it Libtong, Estancia nga ko Lunes it gabi-e hay nadakpan sa sangka checkpoint ro anang bayaw nga nagamaneho sa motorsiklo nga anang ginpanag-iyahan .
Gin-isyuhan sigon raya it ticket bangud sa pilang traffic violations eakip ro pagmaneho nga owa it lisensiya, owa it helmet ag owa it suksok nga face mask.
Matapos nga mabayaran sa treasurers office it munisipyo it Kalibo ro andang multa kahapon it Miyerkules, nagpamalibad sigon si KAP member Roland Inan nga naka-assign sa impounding area sa bahin it Oyo torong St. Kalibo nga i-release ro anang motorsiklo bangud sa isyu it anang tambutso nga ginasugid nga open type muffler.
Apang nagpanindugan ro tagreklamo nga owa man it nakabutang sa citation ticket nga may violation imaw sa anang tambutso .
Samtang, ginpahayag man ni KAP member Inan nga gin-abisuhan sanda it mga katapo it Kalibo PNP nga pabayluhan anay it original nga tambutso ro motorsiklo antes nga i-release.
Owa eon sigon gin-eakip it mga otoridad ro violation kara sa modified muffler agud nga indi madugangan ro anang baeayran .
Ro tagreklamo hay ginpaagto sa opisina it Transport Traffic Management Unit (TTMU)-Kalibo para sa pag-ayos sa nasambit nga isyu.
