Sangka eaeaki sa U.K. nga nagakabaeaka nga nagakabungoe eon ro nakibot bangud sa nakabarang earplugs ro rason it anang pagkabungoe.
Limang dag-on eon nga ginaproblema ni Wallace Lee it Weymouth, Dorset ro mahinang paeamatin-an.
Sangka royal navy veteran si Lee ag ro una nana nga pagduda it anang pagkabungoe hay ro 24 anyos nana nga pagtrabaho maeapit sa mga helicopter.
Sa kagustuhan nana nga masayuran ro rason kara, nagbakae imaw online it home endoscope kit agud nga usisaon ro anang dueunggan.
Sa bulig it nasambit nga gadget, nag-alert ro mini camera kara nga may na-detect nga maisot nga puting foreign object sa anang dueunggan.
Gulpi nana nga nadumduman nga limang dag-on eon ro nagtaliwan, nagbakae imaw it puting earplugs sa airport kat magabisita imaw sa mga igbata sa Australia.
Ginbakae nana raya bangud nga gusto nana nga owa it mabatian nga sangag ag makatueog it dere-deretso sa anang biyahe.
Bangud nga masobra sa 18-oras ro biyahe it eroplano halin sa England paagto sa Australia, nakalipatan eon ni Lee nga boe-on ro sambilog sa mga earplugs ag raya ro naging rason it anang pagkabungoe.
Bangud nga madaeum eon ro pagka-eubong it earplugs, owa eon raya ginhana nga boe-on ni Lee ag nag-agto eon imaw sa sangka ear, nose and throat surgeon.
Madinaeag-on man raya nga nabo-oe it doktor ag uman nga nagbalik sa dati ro anang paeamatin-an.
