BALITA Espesyal–Sangka TikToker sa Belgium ro ginpeke ro anang kamatayon agud nga tan-awon kon sin-o ro matuod nga nagapalangga kana.
Suno sa report, nagpakuno-kuno si David Baerten ukon mas kilaea sa TikTok bilang si Ragnar le Fou bangud sa tan-aw nana hay owa eon it pakialam ro anang mga igbata ag amigo kana.
Ginhimo nana ro nasambit nga prank para magturo it leksiyon kun ano kaimportante ro pag-ililiba it sangka pamilya.
Kakunchaba ni Baerten sa raya nga prank ro anang misis ag unga.
Ro mga raya ro nagpakalhit sa social media angot sa gulping pagkamatay ni Baerten ag ro detalye it anang eubong.
Natabu ro pekeng eubong sa sangka sementeryo maeapit sa Liege, Wallonia region.
Gintambungan raya it eampas sa sang dosenang katawo.
Samtang ginapahaum ro kuno abi hay eubong, nagtugpa ro sangka helicopter maeapit sa sementeryo.
Nakibot ro mga tawo kat makitang nagpanaog halin sa helicopter ro abi nanda hay patay eon.
Gintamyaw ni Baerten ro mga nagtambong sa anang eubong it “Welcome to my funeral”.
Samtang maabu ro nalipay nga bukon it matuod ro anang pagkamatay, may pila man nga naakig bangud nga nadisturbo sanda para eang sa sangka prank funeral nga pagakitaan kara bilang content sa social media.
Bangud kara, nagpaathag si Baerten nga owa nana raya gin obra agud nga pagakitaan it kwarta.
Ginpatigayon nana ro nasambit nga prank agud nga makatau it life lesson ag ipa-realize sa iba nga indi eon dapat nga hueaton pa nga may mamatay para mag-ililiba ro magkapamilya.
