KALIBO, Aklan – Magapangatubang sa kasong pag-eabag sa RA 9165 ukon Comprehensive Dangerous Drugs Act of 2002 ro sangka 20-anyos nga eaeaki matapos nga mabak-ean it binulto nga ginadudahan nga shabu sa ginpatigayon nga operasyon sa Brgy. Mambog, Banga, Aklan.
Nakilaea ro suspek nga si Randy Fulgencio, residente it Purok 3, C. Laserna St., Kalibo ag presente nga naga istar sa nasambit nga lugar.
Suno kay P/Maj. Frensy Andrade it PDEU–Aklan, si Fulgencio hay nabak-ean it sangka mabahoe nga sachet it ginapatihan shabu kabaylo it P10,000 nga buy-bust ag boodle money.
Sa ginpatigayon pa nga body search, nabo-oe ro dugang nga siyam nga mga maintok nga sachet it ginapatihan shabu, drug paraphernalia ag dugang nga mga kwarta.
Nasayuran nga si Andrade hay may dating kaso it pagpanakaw ag ginkanta it mga nauna eon nga nadakpan nga drug suspect sa banwa it Kalibo.
Ginpahayag pa ni Andrade nga kapin sa tatlong buean man nanda nga ginpaidaeum sa monitoring ro suspek antes nga ginkasa ro operasyon.
Samtang, gin-aku it suspek nga sa siyudad it Bacolod imaw nagabo-oe it supply ag sakop it anang operasyon ro banwa it Banga, Numancia, Kalibo ag Boracay.
Sa pihak it anang pagpamalibad, ginbiyahe si Fulgencio sa siyudad it Iloilo agud nga ipaidaeum sa drug test kamana man nga igapa-laboratory ro mga items nga narekober sa anang posesyon ag kontrol.
