KALIBO, Aklan—Nagapangatubang sa patong-patong nga kaso ro sangka 22-anyos nga eaeaki nga nagbaril sa sangka pulis ko Miyerkules it aga-aga.
Suno kay P/Master Sgt. Emil Milleondaga it Kalibo Police Station nga kasong direct assault, pag-eabag sa Republic Act 9165 ukon Comprehensive Dangerous Drugs Act of 2002 ag Republic Act 10591 ukon Comprehensive Law on Firearms and Ammunition Act ro ginpasaka sa suspek nga si Resmar Patenio, ag residente it Brgy. Old Buswang, Kalibo, Aklan.
Madumduman nga si Patenio ro nagbaril kay P/Staff Sgt. Benjie Sarabia it intel operative section it Kalibo PNP, apang sa mayad nga swerte hay owa natamaan.
Nauna kara, naka-engkwentru anay it suspek si Roque Ricamonte, 26-anyos, residente it Toting Reyes St., kun sa siin, gintutukan man nana raya it baril rason nga nag-report sa Kalibo PNP nga nag-ugat sa andang dating tima-tima.
Matapos nga makabaton it impormasyon, nag-agto si P/Staff Sgt. Sarabia maeapit sa sangka hotel sa may Toting Reyes St., Kalibo ag nakita ro suspek nga nakasakay sa motorsiklo nga una sa idaeum it impluwensiya it makahieilong nga ilimnon.
Ginsundan raya ni Sarabia hasta nga ko ulihi hay nagpakilaea imaw.
Apang imbis nga magpundo hay ginpaharurot pa it suspek ro anang motorsiklo hasta nga naka-abot sanda sa Brgy. New Buswang, Kalibo ag dikara ginpaeukpan ro pulis.
Sa pag-korner sa suspek, nabo-oe sa anang posisyon ag kontrol ro sangka improvised homemade hand gun, nga may empty fired cartridge it 12 gauge shot gun ag camouflage nga bag.
Nakita pa sa anang bag ro ginadudahan nga ginpamaea nga dahon it marijuana nga nakaputos sa plastic.
