POLICE Report — Gin-aresto it mga awtoridad ro sangka eaeaki nga nag-tanyag sigon sa social media it trabaho apang nagaresulta sa pagpanghimueos.
Suno sa reklamo it mga biktima, ginkwartahan pa sanda it suspek bangud nga ginaboe-an sanda it video sa mga gina-obrang kabastusan.
Arestado it pulisya ro suspek ko Miyerkules, Oktubre 2, matapos nga magpanago sa sangka ospital sa Manila.
Ginapahayag ni Police Brig. Gen. Arnold Ibay, Director it Manila Police District, nga modus it suspek nga ginatanyagan it trabaho ro mga babaye gamit ro gintakaw nga social media account it sambilog man nga babaye ag kon magpati ro biktima hay pagapa-agtunon raya sa sangka kwarto it sangka hotel.
Dikara sigon nagahueat ro babaeng recruiter.
Ginsaysay pa it mga biktima, ginapainom sanda it softdrinks it suspek nga medyu may nakabutang nga droga rason nga nagakaduea sanda sa andang kaugalingon.
Mag-eowas sa pagpanghimueos, gintakawan man it suspek ro mga biktima.
Dugang pa ni Ibay, gin-aku it suspek nga kapin sa 10 hasta 15 nga babaye eon ro anang nabiktima.
Gina-hack man sigon it suspek ro social media account it biktima ag ginapadaea sa anang mga igbata ro hubeas kara nga litrato ag video para makapangikil.
Natukiban pa it pulisya nga may una eon nga pitong warrant of arrest ro suspek sa mga kasong ilegal nga droga, pagpanakaw, pangpanghimueos ag child abuse.
Gin engganyo man ni Ibay ro iba pang biktima nga mag-agto sa andang taeatapan para makapasaka man it kaso.
