Sangka atleta halin sa Czech Republic ro nakalista it bag-ong world record matapos imaw nga makabuhay it siyam nga oras samtang sa abdominal plank position!
Ginkumpirma it Guinness organization nga napasa-alima it athlete, therapist, lecturer ag personal development coach nga si Josef Salek ro world record title nga “Longest Time in an Abdominal Plank Position (Male category) kat makalista imaw it 9 nga oras, 38 minuto ag 47 segundo.
Napierde nana ro previous record it Australian nga si Daniel Scali ko 2022 nga may record nga 9 nga oras ag 30 minuto.
Natabu ro record breaking attempt ni Salek ko Mayo 20 sa Park Hotel sa Pilsen, Czech Republic.
Suno kay Salek, naging madali ro unang an-um nga oras nana sa plank position.
Apang nabatyagan eon nana ro pagbinhod it anang eawas kat mag abot sa ika-pitong oras.
Pag-abot it ika-siyam nga oras, idtu eon imaw nakabatyag it pagbuyog it ueo ag pagsakit it eawas.
Kat ginpangutana kon paalin nana nga natiis ro pagbuyog it ueo ag pagsakit it eawas agud nga maangkon ro world record, ginpahayag kara nga may anang mental technique kun sa siin gina kondisyon nana ro anang isip nga ro kabuhi hay bukon it madali ag bukon it puro kanami eamang.
Natun-an nana ro nasambit nga technique matapos imaw nga mapresu it pilang buean sa UAE bangud sa kaso it mistaken identity.
Present sa event ro Guinness adjudicator nga si Jack Brockbank ag insigidang gintau kara kay Salek ro certificate bilang bag-ong world record holder.
