POLICE Report — Sangka eaeaki ro naghana nga magpakamatay matapos mapiyerde it ₱15,000 sa sangka bueang sa Naga City.
Base sa report, ginhana it biktima nga magpaligsa sa sangka trak, apang ko ulihi hay nag-eumpat eon lang raya sa Mabolo Bridge.
Ro biktima nga naga-edad it 35 hasta 40 anyos hay residente it Camaligan, Camarines Sur.
Suno kay Punong Barangay Arthur Matos it nasambit nga lugar nga ro eaeaki hay halin sa sangka bueangan ag napiyerde it mabahoe nga kantidad.
Ginpahayag it sangka barangay tanod nga nakasaksi sa insidente nga ko una hay naghana raya nga magpaligsa sa trak, apang nagpundo ro saeakyan rason nga nagdaeagan eon lang imaw sa Mabolo Bridge ag dayun nga nag-eumpat.
Madasig man nga rumesponde ro mga tawo sa palibot ag insigidang naeowas ro eaeaki halin sa tubi, apang owa raya nagahambae.
Sa pag-abot it mga pulis ag rescue personnel, gindaea ro biktima sa ospital.
Samtang, ginpahayag ni Rudel Beringuela, kaibahan it biktima, nagapa-uli eon kunta ro eaeaki sa andang baeay agud nga magbo-oe it kwarta nga pangbayad sa utang nga ₱15,000 sa sugae, apang gulpi raya nga nagdaeagan sa nagapaabot nga trak ag kat napas-eawan sa anang plano hay nag-eumpat sa tulay.
Maabu eon sigon nga nailista nga mga insidente it pagpakamatay sa Mabolo Bridge, kun sa siin pilang katawo ro nag-suicide ko nagtaliwan nga dag-on.
Bangud kara, ginaduso it lokal nga konseho nga magtaeana it pondo para sa pagbutang it safety barriers sa tulay agud nga malikawan ro mga makarondaya nga hitabu sa ulihi nga mga inadlaw.
