KALIBO, Aklan — Arestado ro sangka eaeaki nga una sa drug watch list it kapulisan bilang street-level individual (SLI) kaibahan ro anang live-in partner sa ginkasa nga buy-bust operation agahon it Huwebes, Enero 9, 2025 sa Brgy. Bulwang, Numancia.
Suno kay P/Capt. Conrado Espino Jr., hepe it Numancia Municipal Police Station nga ro mga suspek hay sanday John Christopher Yabut, 24, ag Chescery Belarmino, 34 nga ginasugid nga haeos ap-at nga adlaw pa eamang nga naga-renta it baeay sa nasambit nga lugar.
Trabaho it daywa ro car rentals ag naga-deliver it mga seafoods.
Gin-aresto sanda it gintingub nga pwersa it Numancia MPS ag Provincial Drug Enforcement Unit (PDEU) matapos nga mabak-ean it sangka sachet it ginadudahan nga shabu kabaylo it buy-bust money nga P7,000 .
Sa pag-body search, narekober sa posisyon ag kontrol ni Yabut ro sangka plastic sachet nga may sueod nga 10 nga mga maisot nga sachet it ginadudahan nga illegal nga droga.
Haeos sang dag-on man sigon ro andang surveillance sa mag-live-in partner antes nga ginkasa ro operasyon halin pa sa andang dating gina-istaran sa purok 6 C. Laserna St. Kalibo.
Sa pihak nga parte, hugut nga ginpamalibaran it daywa nga sanda ro nagapanag-iya it mga narekober nga items.
Sa makaron hay una sa police custodial facility ro mga suspek ag nagapangatubang sa reklamong pag-eabag sa RA 9165 ukon illegal possession of drugs.
Nakateana nga pagadaehon ro mag-live-in partner sa crime laboratory sa Iloilo agud nga ipaidaeum sa drug test ag iga-examine ro mga droga nga nabo-oe kanda.
Samtang, ginpahayag ni P/Capt Espino nga naka-alerto sanda sa nagahilapit nga selebrasyon it Ati-Atihan festival bangud sa ginaeauman nga pagbaskog it baealigyaan it illegal drugs.
