Eaeaki ninahan matapos nga mabun-an sa Brgy. Puis, New Washington

KALIBO, Aklan—Ninahan nga gindaea sa Aklan provincial hospital ro sangka eaeaki matapos nga mabun-an sa Brgy. Puis, New Washington.

Ginkilaea ro biktimang si Roniel Iray, 23-anyos ag residente it nasambit nga lugar.

Base sa report, matueog eon kunta imaw kat nakabati it kumusyon sa guwa mismo it andang panimaeay kon sa siin dikara nana nakit-an nga ginakabuligan it pagbakoe ro anang igmanghod it sangka grupo it kaeaeakin-an.

Bangud kara insigida imaw nga nagguwa ag nag-awat apang nabun-an imaw sa tuo nga siki it sambilog sa mga suspek gamit ro siyaw-duko.

Si Iray hay insigida man nga nadaea sa nasambit nga ospital para sa anang nagakaigong medikasyon.

Samtang, ro ginatumod nga suspek hay gilayon man nga nakapaeagyo matapos ro insidente.