POLICE Report —- Owa ginaeauman it sangka eaeaki nga bangud eamang sa P40 nga pusta sa sugae nga cara y cruz ukon tumbo nga nadag-an it nakaaway nga binatilyo ro magiging rason it anang kamatayon matapos nga barilon sa Cebu City.
Nakilaea ro biktimang si Edmund Chan Hecotibo, 34, it Block 27, Brgy. Mabolo, Cebu City samtang nadakpan man ro 16-anyos nga suspek nga owa eon ginpangaeanan.
Suno kay Police Staff Sergeant Francil Boling it Waterfront Police Station, bandang alas-3 it hapon kat matabu ro krimen sa Sitio Laray, Barangay Carreta, Cebu City.
Nagatuhaw sa imbestigasyon it pulisya, antes ro insidente hay nagasugae ro daywa it cara y cruz ag napierde ro biktima.
Sa baylo nga bayaran sigon ni Hecotibo ro biktima hay ginpaandaman pa nana raya nga pagapatyon.
Bangud kara, nag-uli sa andang baeay ro suspek ag pagbalik hay may bitbit eon raya nga .38 caliber revolver ag ginbaril ro biktima sa ueo ag siki.
Matapos ro krimen hay nagpaeagiw ro suspek samtang gindaea man sa ospital ro biktima apang sa daean pa eamang hay nabugtu-an eon raya it ginhawa.
Insigida man nga nagpatigayon it manhunt operation ro pulisya ag nadakpan ro suspek.
Nadiskubre nga kan-o eamang hay nakapaeagiw ro suspek sa Operation Second Chance Center sa Cebu City ag may standing warrant of arrest man raya sa kasong homicide.
Ginapahaum eon ro mga kasong igapasaka kontra sa suspek.
