Patay ro sangka 27-anyos nga eaeaki matapos bun-on it naka-away nga barkada sa Sitio Mapait, Brgy. Aranas, Balete, pasado alas-10:00, Lunes it gabi-i.
Nakilaea ro biktima kay alyas Rogien nga hadaea pa sa aklan provincial hospital pagkatapos nga mabun-an apang gindeklarang dead on arrival.
Pareho sigon nga hilong ro biktima ag ro suspek nga si JM Rimon, 18 anyos, parehong owa it asawa, mga construction worker ag residente it nasambit nga barangay kat matabu ro krimen.
Sa interview it bombo radyo, ginpahayag ni Rimon nga self-defense eamang ro anang gin-obra matapos nga samtang nagakatueog hay gin-gubat raya it suspek sa andang baeay ag ginhana nga eampusan it bote sa ueo nga maswerteng anang nalikawan ag tumama sa anang abaga.
Antes suno kana ro insidente hay owa man sanda nakaangkon it mainitan nga diskusyon sa inuman.
Bangud nga nakibot ag namueaw-mueawan, nabo-oe nana ro kutsilyo nga anang ginahulid ag nabuno ro biktima nga tinamaan sa naubos nga parte it anang waea nga dughan.
Pag-abot it mga rumespondeng pulis hay boluntaryo sigon nana nga ginsurender ro anang kaugalingon.
Kat maumpawan hay nakabatyag sigon imaw it paghinoesoe sa anang gin-obra bangud nga magka-barkada man sanda.
Sa pihak nga parte, ginpahayag man ni P/Capt. Donnie Magbanua, Hepe it Balete Municipal Police Station nga base sa imbestigasyon, ginapatihan nga may dating alitan ro magbarkada sa indi masayuran nga rason.
Nakataeanang pagapasakaan it kasong homicide ro suspek.
Kadungan sa pagka-aresto, narekober sa suspek ro kutsilyo nga gingamit sa krimen.
Presenteng nakakulong sa custodial facility it Balete PNP ro suspek.
