KALIBO, Aklan— Patay ro sangka eaeaki matapos nga gin-eabo it makapilang beses it kaugalingong manugang sa Barangay Agbalogo, Makato, Aklan.
Ginkilaea ni PO2 Ruel Montuya it Makato Police Station ro biktima nga si Marjulie Tropa, 19, samtang ro suspek man hay si Felomino Torrefiel, 54, ag parehong mga residente it nasambitang lugar.
Base sa paunang imbestigasyon it pulisya, gin-usoy sigon it biktima ro anang asawa ag mga onga sa baeay it anang babayeng biyenan nga maeapit eamang sa anda, apang uwa ro mga raya idto.
Bangud kara, nag-uli raya ag uwa kara ginaeauman nga ginabantayan imaw it suspek ag insigidang gin-eabo sa likod ag liog nga gintunaan man kara it anang hinali nga kamatayon.
Nauna eon kara nga nakaangkon it diskusyon ro daywa bangud sigon nga una raya sa impluwensya it aeak.
Samtang, insigida man nga naaresto ro suspek ag nagapangatubang eon makaron sa nagakaigong kaso.
