KALIBO, Aklan — Sangka 20-anyos nga eaeaki ro naboe-an it kapin sa P73,000 nga cash kat magpadaea imaw it kwarta sa tawo nga eakot sa modus nga text scam.
Suno sa biktima nga gintago sa pangaean nga “Jose”, residente it isla it Boracay nga personal imaw nga nagdangop sa Malay Police Station matapos nga mabiktima it text scam.
Ginpahayag nana nga eubus ro anang kalipay matapos nga makabaton it text message halin sa sangka nagpakilaeang Atty. Rey Acosta halin sa Cynthia Villar Foundation nga nagahambae nga sambilog imaw sa mga nagdaog it P850,000 bilang 2nd prize winner sa andang raffle draw .
Nag-tawag sigon imaw kay Atty. Acosta agud nga kumpirmahon ro anang pagdaog.
Dikara imaw gin-engganyo nga kinahangean nana nga magpadaea it bayad para sa processing fee agud nga madali nga ma-release ro anang premyo.
Haeos pitong beses sigon nga nagpadaea ro biktima it kwarta umpisa ko Setyembre 28 hasta nga umabot sa masobra sa P73,000 ro nakulimbat it scammer.
Ko ulihi hay nagduda eon imaw matapos nga puro promisa ro ginapaabot kana.
Samtang, ginlaygay it mga otoridad nga agud nga indi maging biktima, dapat kumpirmahon anay kon matuod nga nagdaog ag kon may gin-intrahan nga raffle promo .
