Sangka tattoo artist sa Brazil ro gin resto matapos nana nga kidnapon ro anang ex-girlfriend para i-tattoo ro pangaean kara sa anang itsura.
Nagapasueod eon sa eskuwelahan sa Sao Paulo, Brazil ro 18-anyos nga si Tayane Caldas kat baeabagan ag piliton imaw nga pasakyon it ex-boyfriend nana nga si Gabriel Coelho sa anang kotse.
Sa kahadlok sa suspek, nagpasugot si Caldas ag gindaea imaw sa baeay kara sa Taubate.
Idtu gin-tattoo ni Coelho ro bilog nana nga pangaean sa tuo nga pisngi it daeaga.
Owa ginpamalibaran ni Coelho ro pag-tattoo sa itsura ni Caldas apang suno kana, owa nana ginpilit ro anang ex-girlfriend ag ginasugid nga masadya raya sa tattoo nga anang ginbutang.
Gin-aresto si Coelho matapos magsugid sa pulis ro pamilya it biktima.
Mag-eowas kara, mapenahan man imaw sa pag-eabag sa restraining order nga ginpasaka ni Caldas ko 2021.
Naging magkarelasyon sanday Coelho ag Caldas ko 2019.
Sa umpisa hay masadya ro andang relasyon apang ko ulihi hay naging seloso ag mapanakit eon si Coelho.
Matapos maging headline sa mga balita ro natabu kay Caldas, maabung Brazilian influencers ag tattoo removal clinics ro nagtanyag it bulig sa daeaga.
Ko nagtaliwan nga domingo, nagpaidaeum eon si Caldas sa unang laser removal session.
