Sangka mangunguma sa West Bengal state, India ro presenteng nagapatindog it kakaibang baeay nga kahawig it nag-eugdang nga barkong RMS Titanic!
Umpisa pa sa pagkabata, handum eon ni Mintu Roy nga mag-istar sa sangka baeay nga korteng Titanic.
Nag-umpisa ro anang handum kat nagtambong imaw sa Durga Puja festival kun sa siin may nagpatindog it korteng Titanic nga pandal.
Ro pandal hay sangka temporary structure nga himo s a butong ag tela.
Gina-obra raya kada may religious festival sa India para patindugan it altar it mga Hindu gods and goddesses.
Makaron nga 52-anyos eon si Roy, owa imaw nagsurender sa anang handum ag padayun nga ginpatindog ro anang Titanic house sa Darjeeling district nga gin-umpisahan nana ko 2010.
Kat gina umpisahan eon ni Roy ro anang baeay nga korteng barko, owa it arkitekto, engineer ag construction company ro nagbaton it gusto nana nga style it baeay.
Bangud kara, nagdesisyon imaw nga imaw eon mismo ro magadisenyo ag magpatindog kara.
Matapos mag-eskwela it masonry sa Nepal it tatlong dag-on, gin umpisahan eon ni Roy ro anang unique nga 3-storey house ko 2010.
Maskin nga inabot eon it 13 years ro pagpatindog it anang dream house ag owa pa raya natapos, naging tourist destination eon raya sa Darjeeling district ag ginadayo raya maskin it mga taga maeayong lugar.
Ginaeauman ni Roy nga matapos eon nana raya sa masunod nga dag-on ag plano nana nga butangan raya it coffee and tea shop sa top floor para sa extra income.
