Sangka 58-anyos nga eaeaki sa Iran ro gina alegar nga nagpundo sa pagkaon ko 2006 ag puro softdrinks eang ro ginaboe-an it nutrisyon ag enerhiya it eawas.
Ko 2006, nabugtaw si Gholamreza Ardeshiri nga may indi mapaathag nga bukon it manami nga pamatyagan sa sueod it anang bibig.
Suno kana nga medyu may “mabuhok ag mahabang bagay” sa anang bibig ag nag abot raya hasta sa anang tiyan.
Nagpatan-aw imaw sa doktor apang owa it makita ro mga raya nga “mabuhok nga bagay”.
Owa man it makahambae kon ano ro nasambit nga baeatian.
Umpisa kato, kada nakakakita imaw it pagkaon hay natagsuka imaw ag nagaeain ro anang pamatyagan.
Sa sobrang pag grabe it anang problema, kinahangean nga magpanago imaw sa kuwarto kada nagakaon ro anang pamilya bangud nga kada makakita imaw it tawong nagakaon hay nagamasakit imaw.
Agud nga magpundo ro nasambit nga pamatyagan, nagdesisyon imaw nga indi eon magkaon ag ro ginaboe-an eon lang nana it enerhiya hay softdrinks.
Umpisa kato, nagakunsumo si Ardeshiri it tatlong bote it softdrinks adlaw adlaw.
Nasayuran ni Ardeshiri nga bukon it mayad sa eawas ro softdrinks.
Suno kana nga nabawasan it 32 kilos ro anang timbang bangud sa anang “softdrinks only diet”.
Apang mag-eowas kara, owa imaw it serious health problems ag owa man it diabetes.
Kada dag-on hay nagapa-check-up imaw ag nagapaidaeum sa endoscopy ag nakumpirma nga healthy ro anang pang-eawason.
Mag-eowas sa softdrinks, kon amat hay naga inom man imaw it tubi ag tsaa.
