Nakibot ro mga trabahador it sangka recycling plant sa Adachi, Tokyo kat makakita sanda it bungo it tawo halin sa mga basurang gina-segregate nanda ko Hunyo 21, 2022.
Insigidang ginpahisayod it recycling plant sa mga awtoridad ro nakit-an nga bungo ag ginpaidaeum raya sa pag-usisa agud nga masayuran ro anang identity.
Sa bulig it dental records, natukiban nga ro bungo hay ginapanag-iyahan it 67-anyos nga si Hideo Murai nga naga-istar sa Kita, Tokyo.
Mas pang napabakod ro anang identity sa bulig it ATM card nga nakapangaean kay Hideo Murai nga kaibahan nga nakit-an sa plastic bag kun sa siin nakaputos ro bungo.
Naglunsar it maeapnagon nga imbestigasyon ro Tokyo Metropolitan Police ag base sa natipon nanda nga mga impormasyon, ro igmanghud ni Hideo Murai nga si Shoichi Murai ro nagpilak it bungo.
Gin-aresto si Shoichi sa kasong illegal disposal of human remains.
Ginpamalibaran ni Shoichi Murai ro kasong ginpasaka kontra kana ag ginpaathag nana nga owa kara nasayuran nga patay eon ro anang manghud nga si Hideo ag eaum nana nga bukon it matuod ro bungo ag raya hay sangka replica eamang.
Ginlimpyuhan nana ro andang baeay bangud nga igabaligya nana raya ag owa nana ginaeauman nga matuod nga bungo it anang manghud ro anang nakit-an.
Pareho nga single ag naga-istar ro magmaeanghud nga Shoichi at Hideo sa sangka baeay sa Kita, Tokyo.
Naga-istar si Shoichi sa first floor ag si Hideo sa second floor.
Suno kay Shoichi, 2017 pa sigon ulihing nakita si Hideo matapos mag-ea-ong kana nga magapamasyar.
Sa pag-imbestiga it mga pulis sa baeay it magmaeanghud, nakit-an ro kalansay ni Hideo sa anang kuwarto.
Owa it nakitang foulplay sa autopsy it kalansay ni Hideo ag nag ensakto nga 2017 ro dag-on it anang kamatayon.
Ginkakibot it mga Japanese netizens ro nasambit nga balita ag sambilog sa espekulasyon it kaabuan hay posibleng namatay sa natural causes si Hideo apang gintago raya ni Shoichi agud nga padayun ro pag abot it pensiyon kara.
Hasta sa makaron , owa gihapon gina abswelto si Shoichi ag padayon ro imbestigasyon sa anang kaso.
