Sangka senior citizen ro gin-aresto sa kasong trespassing sa Mikazuki Temple sa Matsudo, Chiba prefecture sa Japan.
Mag-eowas sa trespassing, ginkasuhan man it property damage si Mitsunobu Hino matapos nana nga i-eansang sa sagradong puno it templo ro sangka ‘‘Wara Ningyo’’ ukon manikang pangkulam nga may nakadukot nga litrato ni Russian president Vladimir Putin.
Umpisa pa ko mayo 2022, naging misteryo ro 10 nga naka-eansang nga Vladimir Putin Wara Ningyo sa mga puno it nagkaeain-eain nga templo sa banwa it Matsudo.
Sa bulig it CCTV it Mikazuki temple, nasayuran nga ro 72-anyos nga si Hino ro may kahimuan it mga raya ag insigida imaw nga gin-aresto it mga pulis.
Base sa dati eon nga pagpati sa Japan, ginagamit ro Wara Ningyo para sa ritwal nga pangkulam.
Ginaduktan ro Wara Ningyo it litrato it tawong gusto nga kulamon ag gina-eansang raya sa puno nga makit-an sa templo.
Ro pag-aresto kay Hino hay bukon it bangud sa pagpangkulam.
Raya hay bangud sa vandalism nga gin-obra nana sa mga magueang ag sagradong puno.
Umabot it 1.6 inches ro kadaeum it buho nga gin-obra nana sa mga puno nga owa ginkalipay it mga monghe.
Gina-istoryahan it mga Japanese netizens ro nasambit nga news headline ag pila sa mga raya ro naka-intindi sa kaakig ni Hino kay Vladimir Putin nga nag-umpisa it giyera kontra sa Ukraine.
Apang sa tan-aw man it kaabuan , indi dapat nga samaron ni Hino ro mga sagradong puno.
Sa makaron hay ginpahilway eon si Hino bangud nga gin-atras eon it mga monghe ro andang reklamo.
Ginpatawad eon nanda si Hino sa kasae-anan nga nahimo .
