Ko Mayo 19, 2022, nakabaton ro 110 emergency hotline it tawag halin sa Sendai, Japan halin sa sangka babayeng teenager.
Nagreport ro caller nga nakakita imaw it eaeaki nga may ginabuytan nga siyaw sa Sendai train station.
Sa mga nagtaliwan nga dinag-on, may mga insidente it pagpangbuno sa sueod it tren sa Japan rason nga madasig nga rumesponde ro mga pulis sa nasambit nga report.
Pag-abot it masobra sa sang dosenang pulis sa Sendai station, naka-istorya nanda ro teenager nga nag-report ag ginklaru it anang kaibahan nga saea ro nakita it teenager.
Suno sa anang kaibahan, bukon it hinganiban ro ginabuytan it eaeaki kundi sangka “Garakei” ukon “flip phone”!
Ro garakei ukon flip phone hay lumang klase it cell phone nga nagabukas ag nagapilo nga matsa sangka kabibe.
Nauso raya sa Japan antes nga naimbento ro mga smartphone.
Kon raya hay nakabukas halin sa pagka-pilo, manipis ro anang itsura ag pwedeng masae-an nga hinganiban it mga pamatan-on nga owa eon naabutan ro makarondaya nga technology.
Agud nga makasigurado nga bukon it siyaw ro andang nakita, gin-usoy nanda sa CCTV ro eaeaki agud nga matumod kon sin-o raya.
Nausoy nanda ro eaeaki sa masunod nga istasyon ag insigidang nagpasugot nga ma-inspection ro anang bag.
Owa it nakita nga siyaw kundi sangka lumang flip phone.
Nagpangayo it pasaylo ro teenager nga nagtau it saea nga report ag nagpangayo man it apology ro mga pulis sa gindisturbo nanda nga eaeaki.
