Sangka doktor sa Thailand ro gin-share sa sangka Facebook post ro operasyon nga gin-obra nana sa sangka pasyente kun sa siin ginbo-oe nana ro mga magnet nga naka-install sa sueod it tudlo kara.
Kaeabanan nga naga share it mga kakaibang medical cases ro Thai doctor nga si Dr. Wat Lun it Wiwat X-ray Clinic-Lab.
Nag-viral sa Thai netizens ro mga litrato nga gin post nana bangud sa kakaibang istorya angot kara.
Makita sa mga litrato ro daywang bilog it magnet ag alima nga ro punto it mga tudlo hay bag-ong tahi halin sa operasyon.
Suno kay Dr. Wat, raya hay alima it pasyente nga nagpabo-oe it mga magnet nga 40 anyos eon nga naka-install sa sueod it tudlo agud nga gamiton sa pagpangdaya sa sugae nga “High-Low”.
Ro High-Low hay sangka sugae nga ginagamitan it tatlong dice.
Pagahulaan it player kon ro kombinasyon nga magaguwa halin sa ginkaeog nga mga dice hay high ukon low.
Low ro resulta kon ro kombinasyon it mga tuldok hay 2 hasta 10.
High kon 11 hasta 18.
Suno kay Dr. Wat nga nagdesisyon nga ipabo-oe it owa ginpangaeanan nga pasyente ro mga magnet bangud nga magueang eon raya ag indi eon makahampang it High-Low.
Mag-eowas kara, unang beses raya nga magasakay it eroplano ag nahadlok nga basi magtunog ro alarm sa airport security ag indi imaw pagpasugtan nga magbiyahe.
Owa ginpaathag kon paalin ro eksaktong pamaagi it pagpangdaya apang may mga netizens sa comments section nga nagtau it espekulasyon nga may saesaeon nga bolitas sa sueod it mga dice para manipulahon ro kombinasyon nga magaguwa sa mga dice.
