KALIBO, Aklan – – – Patay eon kat masapwan sa mismong adlaw it Paskwa nga naga eutaw-eutaw sa baybayon it Brgy. Fatima, New Washington ro sangka 53 anyos nga eaeaki nga wasak ro ueo ag nakaangkon it lastro sa magkaeain-eain nga parte it anang eawas.
Ro biktima hay gin kilaea kay Leopoldo “Dodoy” Salazar ag tumandok it Brgy. Ambolong, Batan apang, presenteng naga estar sa Brgy. Fatima.
Suno sa pagpahayag it anang magueang nga si Anabella Salazar, adlaw it Sabado kat nag eaong sigon ro biktima nga maga padueong sa Brgy. Dumaguit agud makipag inuman sa anang mga barkada apang, umpisa kato hay owa eon raya nakauli.
Gin eaum sigon nanda nga umuli ro anang igmanghod sa Batan apang, sa andang pag usisa hay owa raya nakauli idtu.
Makabig nga barkador suno kana ro biktima apang, owa it mga kaaway.
Hugot man ro pagpati it pamilya it biktima nga gin bakoe raya ag gin pilak sa baybayon nga nagresulta sa anang kamatayun.
sa makaron hay may daywa eon sandang ka mga persona nga gina dudahan nga naghimo kara sa biktima.
Ro mga nasambitan sigon nga persona hay gin paeag ro biktima kapin sa daywang dominggo eon ro nagtaliwan nga may matabo kana sa oras nga maga padueong sa Batan.
Apang, owa sanda nakasayod kun ano ro gina akigan kara sa anang igmanghod.
