INTERNATIONAL News — Sakit it eawas ro naangkon it sangka eaeaki sa Thammarat, Thailand matapos nga eumapos ag mahueog halin sa bungbungan ag bumagsak sa garahe.
Raya hay matapos nga nagmadali nga magpaeagiw ro eaeaki kat madakpan it sangka babaye ro anang gina-obra nga pagpanglingling.
Pagtugpa sa eugta hay eubusan nga naka-eskapo ro suspek sakay it anang motorsiklo.
Matapos ro insidente, gin-review it tagbaeay ro CCTV camera kun sa siin natukiban nga may kahigayunan nga naga-agto man ro eaeaki sa andang bueuearan kada tungang gabi-i agud nga magpanakaw it underwear it babaye.
Nahimo it eaeaki nga maka-agto sa second floor it baeay pinaagi sa pag-saka sa sangka puno.
Gin-report it tagbaeay sa mga pulis ro insidente ag naaresto ro eaeaki. Apang nakahilway man ko ulihi matapos nga magpiyansa.
Ginpakamayad lang it biktima nga ipaguwa sa publiko ro CCTV footage agud nga mataw-an it paandam ro anang mga kababayan.
Mag-eowas sa pagbutang it kurae sa andang palibot, ginpukan man nanda ro puno nga ginasakaan it eaeaki.
Nagaeaum man ro biktima nga eubusan nga makulong ro eaeaki agud nga indi eon sanda makoebaan.
