Sangka Nepali mountain guide ro nakaeowas matapos imaw nga ma-stranded sa Mount Everest it haeos an-um nga adlaw nga owa it bastante nga oxygen, pagkaon, ag maayos nga gintiniran.
Ginkilaea ro eaeaki nga si Dawa Sherpa nga gin-eaum nga namatay eon samtang nagapanaog halin sa alipunto it Mt. Everest matapos nga owa imaw na-contact.
Apang makataliwan ro an-um nga adlaw, nakit-an imaw nga buhi it sangka cleanup team samtang amat-amat imaw nga nagapanaog paagto sa Everest Base Camp.
Insigida imaw nga ginsakay sa helicopter ag gindaea sa ospital sa Kathmandu, kun sa siin, ginabueong imaw bangud sa dehydration, frostbite, ag bali sa toe-an.
Suno sa eaeaki nga naduea-an imaw it oxygen samtang sa mataas nga parte it bukid rason nga indi eon imaw makahueag it maayos.
Ginsaysay pa nana nga owa imaw it makaon sa unang daywang adlaw ag ro anang pamaagi eamang agud nga mabuhi hay ro pag-usap it yelo agud nga maka-inom it tubi.
Nakakita man imaw it pilang tsokolate sa anang boesa nga nakabulig para magbuhay imaw it pilang adlaw sa bukid.
Gin-istorya pa nana nga na-trap imaw matapos nga mahueog sa sangka siwang it yelo it kapin sa daywa ag tunga sa adlaw.
Mabahoe sigon ro anang pagpasaeamat nga nakaangkon it avalanche nga nagtau kana it kahigayunan nga makaguwa.
Matapos makaguwa, gumamit imaw it mga eubid sa bukid para makapanaog maskin nga may peligro gihapon it avalanche.
Base sa report, limang katawo eon ro namatay sa presenteng climbing season sa Everest. Sa kabilugan, masobra sa 300 nga katawo eon man ro namatay halin pa ko 1920s, nga nagapakita it padayun nga peligro sa pagsaka sa pinakamataas nga bukid sa bilog nga kalibutan.
