KALIBO, Aklan—Nagapangatubang sa kasong pag-eabag sa Republic Act 10591 ukon Illegal Possession of Firearms and Ammunition ro sangka eaeaki nga nagpakilaeang miyembro it National Bureau of Investigation ukon NBI sa Brgy. Tabangka, Numancia.
Ginkilaea it Numancia PNP ro suspek nga si Rojelio De Asis Doroy, 50-anyos ag residente it Brgy. Yapak, Boracay.
Narekober sa posisyon ag kontrol it suspek ro sangka 9MM pistol nga may sangka magazine ag loaded it 16 bilog nga bala.
Una kara, nagreklamo sa taeatapan it pulisya si Proculo Ilejay matapos nga may nagakutkot nga mga tawo sa prente it andang residensya ag malisod ro pag-agi it mga delivery van rason nga ginpakamayad kara nga magpangayo it police assistance agud nga mausisa ro ginahimo it mga raya.
Sa pag-usisa it mga kapulisan, nagpakilaea nga miyembro it NBI si Doroy rason nga gin-usuyan it identification card.
Apang, sa pagbukad kara sa anang bag hay nataeopangdan it pulisya ro nasambit nga armas rason nga gin-usuyan imaw it dokumento apang uwa it ginapakita nga papeles rason nga insigidang gindaea imaw sa taeatapan it pulisya kon sa siin raya sa makaron nakakulong para sa nagakaigong disposisyon.
