KALIBO, Aklan — Sa baylu nga magpamaeandong makaron nga Kuwaresma, arestado ro sangka eaeaki matapos madakpan sa aktong nagapanakaw it mga panty ag bra sa sueod it sangka baeay sa Brgy. Cerrudo, Banga, Aklan.
Ro suspek hay nakilaeang si Fredan Bonifacio, 28, sangka laborer ag residente it nasambit nga lugar.
Suno kay P/Staff Sgt. Danilo Dalida it Banga Police Station, naabutan ro suspek it gumankon it tagbaeay nga naga-eubog sa saeog sa kusinang parte it baeay ag nagapabukot it haboe.
Sa pag-usisa it mga rumespondeng pulis, nabo-oe sa sueod it anang suksok nga short ro sangka kulay puti nga panty nga medyu gintapal sa anang kinatawo.
Nag-agi ro suspek sa bintana it CR sa pagsueod sa baeay.
Mag-eowas kara, nabo-oe pa sa anang posisyon ag kontrol ro iba pang underwear, kun sa siin ro iba kara hay basa pa.
Ginasugid nga ro nagapanag-iya it underwear hay dayo ukon bakasyunista sa lugar.
Kasong robbery ro posibleng paga-atubangon it suspek .
