BATAN, Aklan — Padayun nga gina-obserbahan sa Aklan Provincial Hospital ro 38 anyos nga si alyas Jose matapos nga eab-on it eaeaki nga anang gin-ayat it inaway sa Sitio Hueaton, Brgy. Lalab, Batan, bandang alas-8:30, gabi-i it Huwebes, Disyembre 11 it makaron nga dag-on.
Ro biktima hay residente it Brgy. Camaligan Batan samtang ro suspek hay taga Brgy. Dongon East, Numancia ag nagatrabaho bilang caretaker it tangke sa nasambit nga lugar.
Suno kay P/Lt. Luisito Concepcion, OIC chief of police it Batan Municipal Police Station nga base sa imbestigasyon, samtang nagapahuway ro suspek sa sueod it anang payag sa tangke nga anang ginabantayan sa nasambit nga lugar hay nabatian nana ro biktima nga nagasinggitan samtang sakay it anang baroto ag gina ayat imaw it inaway.
Ginbalewala sigon nana raya bangud sa pagpati nga una sa impluwensiya it aeak ro biktima.
Apang samtang naga-eubog-eubog hay nabatyagan nana ro gulping pagbukas it pwertahan it anang payag kadungan ro pagsueod it biktima nga may daea nga sanduko.
Bilang pagdepensa sa kaugalingon samtang nagadueumugan hay nagbo-oe imaw it espading ag na-eabu it makapilang beses ro biktima sa annag ueo ag abaga.
Pagkatapos ro insidente hay nag-surender ro suspek sa punong barangay it Camaligan, Batan nga insigidang nagtawag sa kapulisan.
Nakahilway man sigon eagi ro suspek halin sa detention facility it Batan MPS matapos nga nagdihon it affidavit of non interest to file action ro kampo it biktima.
