Kalibo Aklan ——-Sangka misteryo kun sin-o ukon kun ano ro nasip-eatan kan-o eamang it mga piloto it pilang pampasaherong eroplano sa Los Angeles samtang sanda hay nagapa-landing sa Los Angeles International Airport.
Mabatian sa recording ro pag-istorya it sangka piloto it American Airlines ag ko air traffic control it nasambit nga paeuparan angot sa sangka eaeaking naga-eupad maeapit sa eroplano.
Suno sa piloto, 10 milya ro kaeayuon nanda halin sa airport kat anang makita ro eaeaking naka-jetpack nga naga-eupad sa kataason nga 3,000 feet.
Kapin sa 300 metro sigon ro eayo kara halin sa eroplano.
Matapos eang ro 10 minuto, sambilog pang piloto it ibang eroplano ro naghambae man sa air traffic control nga may nasip-eatan man imaw nga eaeaking naga eupad nga may suksok nga jetpack.
Bangud kara, nagtau eon it paandam ro air traffic control sa ibang eroplano nga paagto sa airport nga mag-dahan bangud nga may tawong naga eupad nga naka-jetpack maeapit sa paeuparan.
Gina imbestigahan eon man it Federal Bureau of Investigation ro hitabu.
