BANGA, Aklan—Sa imbestigasyon it kapulisan sa bulig it Scene of the Crime Operatives ukon SOCO-Aklan, natumod ro identity ukon pagkatawo it sangka eaeaki nga nauna eon nga nakit-an nga patay nga una eon sa state of decomposition sa bibi it Aklan River nga sakop it Brgy. Palale, Banga bandang alas-9:30 it agahon it Martes, Pebrero 17.
Matapos mabalitaan ro nasapwan nga bangkay, nag-agto sa lugar ro punong barangay it Polo, Banga ag pamilya it sangka epileptic nga eaeaki nga nauna eon nga gindeklara nga missing person ko Pebrero 13, kun sa siin ko ulihi hay nakumpirma nga raya ro andang naduea nga miyembro it pamilya.
Ro biktima hay positibo nga ginkilaea it anang igmanghud nga si Rogelio Cruz, 60 anyos, owa it asawa ag residente it Brgy. Polo sa nasambit nga banwa.
Suno kay Carmelita Cruz, manghud it biktima nga ko una hay owa nanda nakilaea ro bangkay bangud sa kahimtangan it anang magueang.
Mag-eowas sigon sa pirmeng gina-atake it anang sakit nga epilepsy hay bulag ro anang sangka mata.
Madumduman nga mga construction worker nga naga-obra it revetment wall sa lugar ro nakakita sa naga-eutaw-eutaw nga bangkay nga hanang-it sa mga jackstone sa kilid it suba.
Suno kay Mike Rebis, sangka construction worker, antes nanda nadiskubre ro bangkay hay nakahugum sanda it mabaho ukom maalingasaw nga hugum .
Ro biktima hay ginaboeobanta nga 5’5” ro kataason, nakasuksok it brown shorts ag owa it t-shirts.
