KALIBO, Aklan — Nasapwang patay ag matig-a eon ro eawas it sangka construction worker samtang nagakatueog sa sueod it anang kwarto sa ginarentahang boarding house sa Sitio Bantud, Barangay Manocmanoc, Boracay.
Ginkilaea ro biktimang si Mark Jun Sanguillosa, residente it Barangay Toledo, Nabas, Aklan ag nagatrabaho sa isla.
Suno kay Edmund Cahiro, sambilog sa mga kaibahan sa boarding house it biktima nga nagakangawa sigon raya kat makapilang beses nana raya nga ginpukaw apang uwa nagasabat.
Kat adtunan sa anang kwarto hay nadiskubreng nakaeobog raya ag matig-a eon ro anang eawas.
Sa imbestigasyon it Boracay PNP, nakipag-inuman pa sigon ro biktima sa anang mga amigo halin alas-10:00 it gabi-e hasta alas-12:00 it tungang gabi antes nasapwang patay.
Uwa sigon it nakit-ang foul play sa pagkamatay ni Sanguillosa.
Nagguwa sa pag-usisa ni Dr. Agatha Valerio sa gindaehang klinika sa isla nga “acute pancreatitis secondary to alcohol intoxication” ukon sobra-sobrang pag-inom it aeak ro kabangdanan it pagkamatay it biktima.
