Sangka eaeaki sa United Kingdom nga nagkaon it sandwich sa sangka Christmas market ko 2017 ro nagreklamo nga raya ro rason kon ham-an nga hasta sa makaron hay owa pa imaw it pundo sa pag-utot.
Ko 2017, nagbakae si Tyrone Prades it ham sandwich halin sa sangka food stall sa Christmas market sa Birmingham.
Pilang oras matapos kaunon ro sandwich, nakabatyag imaw it stomach cramps, eagnat, pagsuka ag diarrhea.
Limang domingo imaw nga naging bedridden bangud sa food poisoning.
Pagkatapos maka-recover halin sa pagmasakit, nag-umpisa eon nga makaexperiensiya si Prades it pagtunog it tiyan ag indi mapugngan nga pag-utot nga nagiging rason it kahuy-anan sa mga tawo sa anang palibot.
Limang dag-on matapos makakaon it contaminated nga sandwich, gin-demanda ni Prades ro tag-ana it food stall sa balor nga 200,000 pound sterling.
Ginpahayag it abogado ni Prades nga bangud sa nakaon nana nga sandwich nga may salmonella it anang kliyente, nagulo ro anang kabuhi ag nabudlayan eon raya nga magguwa it baeay bangud sa owa it pundo nga pag-utot.
Suno man sa mga abogado it kompanyang tag-ana it food stall nga Frankfurt Christmas Market Ltd, kinahangean nga pamatud-an it mga abogado ni Prades ro andang claim nga contaminated it salmonella ro anang nakaon nga sandwich bangud nga suno sa environmental health officer nga nag-imbestiga, limang dag-on eon ro nagtaliwan , e.coli eamang ro nakit-an sa utensils it foodstall idtu .
