Ginpahayag it sangka opisyal sa sangka zoo sa San Diego nga maga-apply sanda sa Guinness World Records agud nga makilaea ro andang gina-alagaan nga Pacific pocket mouse bilang pinakamagueang nga eanggam sa bilog nga kalibutan sa edad nga nueve anyos.
Suno sa San Diego Zoo Wildlife Alliance nga naga-dumaea it zoo nga ro nasambit nga eanggam nga nakilaea kay Pat bilang pagtau it pasidungog sa actor nga si Patrick Stewart hay ginapatihan nga pinakamagueang nga nagakabuhi nga eanggam sa bilog nga kalibutan sa edad nana nga 9 years ag 5 months.
Si Pat hay natawo sa zoo ko July 12, 2013, ag ginpabutyag it wildlife alliance nga magapatigayon sanda it special event sa Feb. 8 agud nga i-celebrate ro maeawig nga kabuhi it eanggam kamana man ro paghana nga mabo-oe ro Guinness World Records title nga oldest living mouse in human care.
Sangka adjudicator it Guinness ro nakataeanang magatambong sa event agud nga ma-verify ro edad it eanggam.
Nasayuran nga ro Pacific pocket mouse hay ro pinaka-maisot nga species it eanggam sa North America, kun sa siin ro zoo hay nagtukod it breeding ag reintroduction program para sa species ko 2012 agud nga mabuligan nga uman nga mapa-abu ro nagasangkiri kara nga populasyon.
Ro pinakamagueang nga eanggam nga nailista it Guinness World Records nga nakilaea sa pangaen nga Fritzy hay namatay ko 1985 sa edad nga 7 years and 7 months.
