Naalarma ro pilang mga motorista matapos makit-an ro sangka eapsag nga nagakamang sa kilid it national highway sa Barangay Tabalong, Dauis, Bohol, adlaw it Martes, Enero 27, 2026.
Insigida nga nagpundo ro mga raya ag ginpabinit ro unga agud nga indi mabungguan it mga naga-agi nga saeakyan.
Base sa dash cam footage, makit-an nga maeapit ro eapsag sa mga naga-agi nga mga saeakyan, nga nagtau it pagkabaeaka sa anang seguridad.
Sa imbestigasyon it Dauis Municipal Police Station, nasayuran nga bag-o eamang nagselebrar ro eapsag it anang unang kaadlawan apang may nag-eontad nga owa pagka-intindihan sa tunga it anang ama ag ina antes ro ginasugid nga pagbilin kana sa karsada.
Ginapatihan nga ginpabay-an ro nasambit nga eapsag it anang ina sa highway agud mabo-oe ro atensyon it anang asawa nga nagpadayon sa pagtrabaho bisan ginpangabay it babaye nga magpabilin bangud nga kaadlawan it andang unga.
Sa makaron, una eon sa kustodiya it lolo ro eapsag samtang padayon ro imbestigasyon it kapulisan ag posible nga may kaso nga igapasaka kontra sa mga ginikanan.
