KALIBO, Aklan—Padayun nga gina-usisa it mga otoridad kon sin-o ro owa it kaeo-oy nga ina nga nag-abandona sa sangka bag-ong tawo nga eapsag nga eaeaki nga nakit-an sa sueod it tangkae nga ginahampangan eon it daywang nakakulong nga baboy sa Sitio Bantud, Barangay Puis sa banwa it New Washington.
Suno kay Francisco Nerval, alyas along, tag-ana it baboy nga ko Disyembre 26, bandang alas-6:30 it agahon samtang nagabahog it anang mga alaga hay eubus ro anang pagkakibot matapos nga mapan-uhan ro eapsag nga ko una hay gineaum nana nga tiyo it ayam.
Gin-amat-amatan eon sigon nga eapa-on it baboy ro mga tudlo it eapsag.
Insigida nana nga gin-report sa andang punong barangay ro makaeoeo-oy nga gindangatan it eapsag.
Mag-eowas nga medyu masaeom eon ro mata it magueang hay medyu mahina eon ro anang paeamatin-an rason nga owa sigon nana napan-uhan nga may nagatangis nga eapsag ko gabi-it it Disyembre 25.
Samtang, base sa pag-usisa sa tanan nga mga nag-prenatal sa lugar hay kumpleto rason nga mabahoe ro pagpati it mga otoridad nga taga-ibang lugar ro ina nga nagpilak sa anang eapsag.
Nasayuran nga hubeas ag owa it anuman nga putos sa eawas ro eapsag kat nakit-an nga owa pa naputoe ro anang pusod.
Suno kay punong barangay Jerson Arboleda it Puis, New Washington nga paga-obrahon nanda ro tanan agud nga maresolba ro nasambit nga kaso sa pagpanguna it pulisya.
Ro bangkay it eapsag hay ginpabunyagan ni mayor Jessica Panambo ag ginpangaeanan kay Hesus.
Raya hay sa poder makaron it municipal health office ag nakataeanang igapaidaeum sa autopsy.
