KALIBO, Aklan—Ginkutkot ag gintaw-an it disenteng eubong it barangay council it Brgy. Tinigaw, Kalibo ro sangka bag-ong unga nga eapsag nga gin-eubong eamang it anang ina sa kilid it andang baeay matapos nga mamatay kat gin-unga.
Mayo 10 kat maka-abot sa konseho ro nasambit nga impormasyon matapos nga magkalhit ro istorya ag mag-viral sa social media ro post it sangka netizen angot sa basta eamang nga pag eubong it 24 anyos nga ina sa anang eapsag kaibahan ro anang mister.
Bandang alas-10:30 it gabi-i ko Mayo 7 kat natawo ro eapsag kaibahan ro anang kambal nga parehong eaeaki, apang bangud nga premature ro mga raya nga haeos pitong buean eamang nga gindaea sa tiyan rason nga sa owa it swerte hay namatay ro sambilog.
Gin-eubong raya pagka-aga it Mayo 8 sa hasta sa tuhod it daeum nga kutkot it anang mga ginikanan.
Depensa it ina nga mag-eowas nga naaeang-aeangan sa pag-unga, ginpakamayad nanda nga indi eon magpadaea sa ospital bangud sa kakueangan it pinansiyal nga kinahangeanon.
Samtang, ginpahayag ni punong barangay Lourdes Reyes nga nagpangayo man it pasaylo kana ro ginang bangud nga owa sigon sanda nakasayod nga may naga eksister nga laye nga bawae nga mag-eubong it patay nga eapsag sa kilid it andang baeay.
Ro insidente hay nagtuga it kahadlok ag pagkabaeaka sa mga residente sa lugar.
Pinaagi sa laygay it Department of Health, gin-obrahan it birth certificate ro kambal nga nabuhi ag gin-eubong sa sementeryo ro sambilog nga namatay.
Sa bulig man ni Kalibo mayor Juris Sucro hay natigayon nga maeubong ro eapsag sa Kalibo municipal cemetery.
Nasayuran nga 14 anyos pa eamang kat nag asawa ro ina ag antes ro pag nabdos it anang kambal hay may tatlo eon raya nga unga makaron.
