Kalibo Aklan ——Owa it kabuhi kat madiskubrehan it mga opisyales it Brgy. Poblacion, Nabas ro sangka gin-eubong nga eapsag maeapit sa baybayon it banwa.
Suno Kay P/Cpl. Andrew Andrade it Nabas Police Station, nakabaton sanda it tawag halin sa Punong Barangay it lugar nga nagahambae nga may una nga nadiskubrehang gin-eubong nga pitong buean nga eapsag sa tiyan sa lugar.
Sangka 23-anyos nga babaye sigon ro ina it nasambitang eapsag ag owa raya it asawa.
Raya sigon hay natabo ko Agosto 25, 2020.
Ro eapsag sigon hay gin-eubong sa kutkot kamana man nga gintambakan it baeas ag gintakpan pa it hollow blocks.
Insigida nandang gintawag ro igtueopangod it Rural Health Unit it banwa.
Kaangot kara, insigida man nga natumod it mga otoridad ro responsible sa insidente kung sa siin ginakaeakipan raya it mismong ina it eapsag ag daywang ka eaeaki.
Natueopangdan nga antes matabo ro insidente hay magkaibahan nga naga-inuman ro tatlo sa sangka payag nga kapin sa 300 metro ro kaeayuon halin sa baybayon nga andang gin-eubngan it eapsag.
Ginasugid nga pilang adlaw eon sigon nga nakakabatyag it pagpaeanakit it tiyan ag ueo ro babaye rason nga insigida imaw nga nag-inom it bueong.
Apang, ko Agosto 25 it ala-1:45 it aga-aga hay nagbanyo sigon raya ag pagbalik nana sa eugban halin sa payag kung siin sanda nag-inom hay nag-grabe sigon ro pagpaeanakit it anang tiyan ag dikato sigon gulping nagguwa ro eapsag.
Ginpahayag dugang ni P/Cpl. Andrade, owa man it nakitang indikasyon nga may abortion nga natabo antes pa nagguwa ro unga base sa report it health officials it banwa.
Sa makarun hay naeubong eon ro eapsag sa Nabas cemetery samtang ro ina kara hay presenteng sa ospital kamana man nga nagapadayun pa ro imbestigasyon it mga kapulisan sa insidente.
