KALIBO, Aklan—Magatapos eon ro early registration sa mga pampublikong eskwelahan para sa school year 2023-2024 sa maabot nga Hunyo 9, 2023.
Suno kay Bien Parel, senior education program specialists ag division information officer it Department of Education ukon DepEd-Aklan nga naging madinaeag-on ro andang ginlunsar nga early registration bangud nga maabu ro nagpa-enroll para sa incoming Kindergarten, Grades 1, 7 ag 11 nga learners.
Ro mga learners sigon sa iba nga grade levels hay indi eon kinahangean nga magpartisipar sa registration bangud nga makabig eon sanda nga pre-registered para sa masunod nga school year.
Agud nga mabaton sa kindergarten, ro unga hay kinahangean nga limang dag-on ro unga pag-abot it October 31, 2023, bangud nga ro bukas it klase hay sa Agosto, base sa DepEd Order No. 47 series of 2018.
Mag-eowas sa enrollment form, ro mga dokumento nga kinahangean para sa registration hay ro birth certificate it learner nga ginpaguwa it Philippine Statistics Authority.
Kon bukon pa it available ro PSA birth certificate, pwede pa raya nga maisumite antes ro pagtapos it early registration ukon sa pagtapos it enrollment sa August 31 it makaron nga dag-on.
Kadungan kara, gina engganyo man ni Parel ro mga pribadong eskwelahan nga i-align ro andang calendar of activities sa andang early registration ag obrahon raya nga face to face.
Ro pagtapos it klase hay sa maabot nga Hulyo 7, 2023.
