KALIBO, Aklan—Ginkakas eon it Department of Environment and Natural Resources (DENR) ro suspensiyon it Environmental Compliance Certificates (ECCs) sa tanan nga mga establisyemento sa Isla it Boracay kaangot sa nagahilapit kara nga pagbukas sa Oktubre 26.
Raya hay kasunod sa ginpaguwang Memorandum Circular No. 2018-14 it ahensya kon siin ginmanduan ni Environment Sec. Roy Cimatu ro Environmental Management Bureau (EMB) Regional Office 6 nga dueaon ro suspensyon it ECCs sa tanan nga mga complying hotels and establishment sa Isla.
Suno pa sa sekretaryo, sa pihak it lifting hay magapadayon sigon ro pagreview it EMB sa mga establishment’s compliance nga may ECCs ag Environmental Management Plans; ag maging sa mga establisyementong nataw-an it Certificate of Non-Coverage (CNC) agud masiguro kon nagasunod ro mga raya sa environmental laws.
Nasayuran nga nag-umpisa ro suspensiyon it ECCs sa Boracay ko Hulyo 18, 2018 pamaagi it Memorandum Circular No. 2018-03 para usisaon ro compliance it mga establisyemento.
Samtang, 18-diyas eon lang ro nabilin para sa Boracay re-opening countdown.
