KALIBO, Aklan— Gina-amat-amatan eon nga hakuton it ECOS Sanitary Landfill and Waste Management Corporation ro mga nakatambak nga basura sa Materials Recovery Facility ukon MRF sa isla it Boracay.
Raya ro ginkumpirma ni Kagawad Christian Gelito it Barangay Manocmanoc ag nagatindog nga Chairman it Committee on Environment it Konseho.
Suno kana nga agud nga maprotektahan ro andang mga residente ag estudyante halin sa maperwisyong mabaho nga hugum it basura, ginpakamayad nanda nga baeabagan ro garbage truck it ECOS nga magpilak it basura eabi eon ro bio waste sa MRF.
Ginhimo man sigon nanda ro nasambit nga tikang agud nga indi eon man eubusan nga masamad ro imahe it isla ag maamligan ro kanami it lugar eabi pa ag makabig nga peak season makaron.
Sa mayad nga swerte suno kana ag direkta eon nga ginahakot it garbage trucks sakay it barge ro mga basura ag owa eon ginatinir pa sa staging area kara sa Barangay Manocmanoc.
Ro mga basurang ginahakot hay ginapilak sa Kabulihan sanitary landfill sa banwa it malay nga gina-maintain it ECOS.
Sa pihak nga parte, nagakabaeaka ro Barangay Council sa oras nga tumama ro bagyong Amang ag magtuga it mga pag-uean nga mas makadugang sa mabaho nga hugum.
Gindugang pa ni Gelito nga engkaso nga mag hire it dugang nga hauler ro kompaniya hay posibleng matapos nanda ro paghakot ro bio waste sa sueod it sang buean.
Madumduman nga nauna eon nga ginpaabot ni Manocmanoc Barangay Captain Nixon Sualog nga may kahigayunan nga napilitan nga magkansela it klase ro Manocmanoc Elementary School ag Manocmanoc National High School bangud sa ginareklamong air pollution halin sa kaiping nga MRF.
Presente makaron nga gina-review it Sangguniang Bayan it Malay ro ginsueod nga kontrata it ECOS sa LGU-Malay.
