KALIBO, Aklan—Maskin nga pagaboe-on eon ro ginapatuman nga Enhanced Community Qauarantine (ECQ) sa Barangay Balabag ag Surgical lockdown sa Purok 1 ag 7 sa Barangay Manocmanoc sa isla it Boracay hindunang alas-11:59 it gabi-i, Abril 14, 2021, nagplastar sa gihapon ro lokal nga gobyerno it Malay it mas hugut nga patakaran.
Suno kay Malay Mayor Frolibar Bautista sa pagbo-oe sa ginapatuman nga quarantine classification sa nasambit nga mga lugar, dapat nga mas pang ugalion it publiko ro pirmeng paghugas ukon pag disinfect it alima, pagsuksok it face masks ag face shield, pag likaw sa maabung tawo ag social distancing.
Bawae gihapon ro operasyon it mga bars, restaurants ag food parks nga may mga live shows ag music kamana man ro bueang ag non-essential gatherings.
Magapabilin gihapon ro curfew hours sa bilog nga isla umpisa alas- 11:00 it gabi-i hasta alas-4:00 it aga-aga.
Limitado man sa 30% it seating capacity ro pagapasugtan nga magtambong sa mga misa sa simbahan.
Ro nasambit nga mga lugar hay igabalik eon sa Modified General Community Quarantine (MGCQ).
