KALIBO, Aklan—Gustong-gusto it mga Ecuadorians ro pag-selebrar it Valentines day bangud sa andang kina-iya nga masyadong expressive sa andang nabatyagan.
Suno kay Bombo International Correspondent Novee Leon it Ecuador nga makabig nga affectionate ag romantiko ro mga latino rason nga gusto nanda ro mag-PDA ukon public display of affection.
Pilang adlaw sigon antes ro Pebrero 14, haeos mapuno eon it mga heart shaped nga dekorasyon ag mga pang-regalo ro mga malls ag mga establisimento.
Mag-eowas kara, maabu man nga mga gimik ro mga restaurants agud nga kumita it mabahoe.
Nagasoeputan man ro mga flower stands sa nagkaeain-eain nga parte it siyudad.
Kilaea suno kana ro Ecuador bilang capital it Ecuadorian roses nga gina-export.
Apang sa nasambit nga nasyon, haeos gina-bargain eon lang ro pagbaligya kara kun sa siin ro sang dosena hay nagabalor eamang it 2 US dollars ukon katumbas it 100 pesos.
Uso man sigon idtu ro delivery it mga bueak, chocolates, stuffed toys ag iba pang regalo.
Bangud kara, mabahoe nga bagay suno kana sa mga mangunguma ro valentines day bangud nga dikara nagakita it mabahoe ro Ecuadorian roses industry.
Kapareho sa Pilipinas, kada valentines day hay nagapahaum man ro mga kababayin-an it manami nga eambong para sa andang date.
Mas nakaka-kilig sigon kon ro roses ag chocolates hay may kaibahan nga “mariachi” ukon banda nga maga-harana.
Si Novee hay nakapangasawa it sangka Ecuadorian sa sueod eon it siyam nga dag-on nga nakilaea nana sa “online dating app” ag makaron hay may sambilog nga unga.
