KALIBO, Aklan–Kadungan sa pagdumdum sa ika-37 nga anibersaryo it Edsa People Power Revolution, gin engganyo it batikang abogado sa Aklan ro mga Filipino nga pasidunggan ro mga tawo nga padayun nga nagatinguha agud nga magapabilin nga buhi ro legasiya it peaceful revolution sa nasyon.
Suno kay Atty. Plaridel Morania nga maskin nga mabuhay eon nga tiempo ro nagtaliwan , apang ro mga hitabu sa People Power Revolution hay nagapabilin sa atong kaisipan kat ro minilyon nga mga pumueuyu hay nagtililipon sa Edsa agud nga mabawi ro demokrasya it nasyon.
Ginpahayag dugang nga ro pagdumdum sa ginakabig nga malinong ag bukon it madugo nga rebolusyon hay nagaserbing mabaskog nga reminder nga ro pagtingub, kooperasyon ag pagtu-o hay mabahoe nga bagay sa pag-umwad it nasyon.
Kadungan kara, gin kumbinsi ni Atty. Morania ro tanan nga tuearon ro ginpakitang kabaganihan , pag-ulikid sa isigkatawo ag compassion it mga tawo nga nagpasakop sa rebolusyon.
Sa pihak nga parte, kinahangean man suno kana nga ipa-eubot sa mga estudyante kon ano ro event sa holiday nga ginapatigayon agud nga masayuran nanda.
Imbis nga Pebrero 25, kahapon, Pebrero 24 gindeklara ro special non-working holiday sa idaeum it Proclamation 1236, sa pagdumdum sa makasaysayang rebolusyon nga nagpabagsak sa rehimen ni dating President Ferdinand Marcos Sr. ag uman nga nagpabalik sa demokrasya it nasyon.
