KALIBO, Aklan—Tiempo it paghaead, pagkinasadya, pagkaeasugot ag pagmaeahaean ro selebrasyon it Eid’l Adha ukon Feast of Sacrifice it mga igmanghud nga Muslim.
Apang suno kay Gabriel, secretary it Noor Allah Village sa Brgy. Camanci Norte, Numancia may mas madaeum pa nga kahueugan kon ham-an nga ginadumdum nanda ro nasambit nga tradisyon.
Raya suno kana hay ro pagdumdum it mga Muslim sa kahauman ni Ibrahim nga isakripisyo ro anang bugtong nga unga nga si Ishmael bilang pagsunod sa mandu ni Allah.
Ro selebrasyon suno kana hay senyales man it pagtapos it dag-unan nga Hajj ukon Islamic pilgrimage sa Mecca sa Saudi Arabia.
Kaibahan sa andang selebrasyon hay ro pagkatay it baka nga makabig nga sangka halal nga sapat nga ginpanupod sa andang mga miyembro sa nasambit nga village.
Ginasugid nga ro andang pagsakripisyo agud nga magbakae it mga sapat kapareho it karnero, camel, baka ag kanding hay pamaagi it andang pagpalangga kay Allah.
Kaeabanan nga ro mga sapat hay ginabakae it mga manggaranon nga Muslim ukon gina-aeamutan agud nga ipanupod sa mga nagakinahangean nga igmanghud.
Mag-eowas sa mga pahampang, nagapahaum man sanda it bonggang pagkaon nga ginasaeuhan it bilog nga pamilya.
Pila pa sigon sa andang mga kaibahan hay naga-agto sa mga baybay agud nga magpaligos.
Sambilog man sa andang aktibidad kada Eid’l Adha hay ro tingob nanda nga pagpangamuyo nga naga-umpisa bandang alas 4:30 it aga-aga.
Raya ro pangamuyo sigon samtang ginahueat ro pagbut-eak it adlaw.
Raya hay pagasundan it Sala ukon pagpangamuyo it mas mabahoe nga grupo, nga sambilog man sa mga highlight it selebrasyon.
Pagkatapos kara hay pagahiwaton ro sermon it Imam.
Samtang, ginpahayag ni Gabriel nga nakabatyag sanda makaron it kahilwayan bangud nga owa eon it mga restrictions tuga it covid 19 pandemic.
Tatlong adlaw sigon ro selebrasyon nanda nga gin-obra nga holiday.
