KALIBO, Aklan–Malipayon nga ginselebrar it Muslim Community ro Eid’l Fitr ukon pagtapos it Ramadan kahapon.
Ginpahayag ni Bro. Abdul Karim Badjo, Aklan Muslim Coordinator nga ro sang buean nga pagselebrar it Ramadan hay ginakabig nanda nga mabahoe nga grasya bangud nakokontrol nanda ro andang kaugalingon partikular sa paghimu it maeain.
Suno pa kay Badjao nga masami sa mga muslim hay ginapili nga magpahuway sa adlaw pagkatapos it pagpangadi bangud may oras sigon ro andang pagkaon.
Pag-abot sigon it 4:20 it aga-aga indi eon sanda puwedi nga magkaon ukon mag-inom it tubi hasta it alas-6:10 sa gabi-e.
Ginakabig man sigon nanda nga piyesta ro Ramadan bangud apisar nga indi sanda puwedi magkaon sa adlaw hay nagabawi man sanda sa gabie.
Samtang, ginselebrar man it kaeabanan sa Muslim Community ro Eid’l Fitr sa sangka resort sa Nabas para magpaligos ag magaserbi raya nga paglimpyo sa andang kaugalingon ukon pagtao it kahilwayan bangud sa pagpanerbisiyo sa bilog nga sang buean it Ramadan.
Sa pihak nga parte, kaeakip eon it andang selebrasyon ro pagpanupod it sang gantang nga bugas ag pagpakigbahin it andang grasya nga naangkon sa mga mas nagakinahangean sa kabuhi.
