Gin-engganyo ni Filipino pole vaulter EJ Obiena ro publiko nga padayun nga suportahan si tennis star Alex Eala sa tunga it mga batikos nga nabaton kara bangud sa sunud-sunod nga pagka-piyerde.
Sa anang social media post, ginpamilit ni Obiena ro grabeng pressure nga ginapangatubang it mga atleta ag ginpahayag nga indi dapat matabunan it resulta it sangka kompetisyon ro andang mga dinag-on nga pagpahaum ag pagtinguha.
Nakabaton it batikos si Eala matapos ro anang mga pagkapiyerde sa Wuhan Open ag Singapore Tennis Open, kamana man ro pag-angkon eamang nana it bronze medal sa 2026 Asian Games matapos mapiyerde sa semifinals it women’s singles.
Suno kay Obiena, maskin ro mga pinakamayad nga atleta hay nakaka-eksperyensiya man it pagdaog ag kapiyerdihan, kamana man mga manami nga adlaw ag pagsubok, rason nga importanteng padayun sanda nga suportahan.
